هر چی بین ما بیده تمومه تمومه

هر چی بینِ ما بیده تمومه، تمومه
عکسل تونه امشو دله مو ایکنه پاره
هر چی تونه بخشیدمه حالُم بدتر آوی
اِشکهسه دلم ایبو وَ دهسِ تو دوباره

مو عشقته نیخوم
رسمِ روزگاره
تا دیری و دوسی
دماره دل دراره

بِی رسمِ زمونه
دلُم ناسازگاره
خوم دیدمه ایی عشق
بلا سرم ایداره

تا روز قیومت دله مو تِی تو نیایه
ایدونه دلم قلبِ تو گُل یه بی وفایه
گَپ سرده تو هر شو دلمه ایکُنه داغون
عشق تو گُلم‌سی مو یه دردِ بی دوایه

#سهراب_عرب_زاده

یه دلم ایگه بره یه دل دم ایگه که بمون

یه دلُم ایگه بِره، یه دل دَم ایگه که بمون
مو دلُم خینهِ وَ دهسِت، مِن دو راهی گیرُم
نه پَسُم ایزنه وُ نه تِی مو ایمونه دلت
مو وَ دهسِ دو دلیت، آخر یه شو ایمیرُم

همنه پس زده قلبُم
مو کلو تو بیدُم
تو بری وُ مو بمونُم
مثِ روز ایدیدُم

آخرِ قصه ی ما روشن بی
مو کلو بیدم و قلبه تو نبید
تو که رهتی دیدی 
 که چطو دل مو بُرید

همه گفتن که تو نیمونی وُ عاشق نی بِی
تو که گُهتی غلطه ، حرفته باور کردُم
تو که رهتی دیدُم ،حرفله مردُم رآسه
سیچه مو گوش وَ تو، بی دل و کافر کردُم
#سهراب_عرب_زاده

عقرب تیلت زه منه جونم

عقرب تِیَلِت زه مِنه جونم
تا صُب نیکشه دل مو گمونم
پیت ایخره دل بعد تو هر شو
وابی نومه تو وردِ زبونم

ای گُل مو خرابُم
سی دل تو کبابُم
تِی دل مو بیو تو
کمتر کُه عذابُم

باز شو وَ در اومه
جونُم وَ سر اومه
قاصد مو که رهته
باز بی اثر اومه

ایی سینه بدونِ تو خماره
ترسُم که دماره دل دراره
هی بونه وَ مو ایگره بی جا
دل زخمیه دهسِ روزگاره

دل سی تو کلوی کوچه گرده
ایی سینه سراسر پُره درده
دهسلمه دلُم ایکُنه، ها خوش
قلبِ مو وُ دهسل مو چه سرده

#سهراب_عرب_زاده

تیم هر شو و در مونده که شاید تی مو ورگردی

تِیَم هر شو وَ در مونده، که شاید تِی مو وَرگردی
یه در صد اَر که وَرگردی، یه در صد سی مو دنیایه
همیشه انتظارُم مو، همیشه سمتِ درتایُم
همیشه احتمال اییدُم، نفس تا سی مو اییایه

هی نشهسُم غصه خردُم
مثله مُرده سی تو سردُم
مرهمی دَهسِت ندیدُم
سی تمومِ زخم و دردُم

عمرمه دیدُم سر آوی
غم وَ بارُم آخر آوی
بی تو هر شو حال ایی دل
غم گروهت و بد تر آوی

وَ اوره شعرلُم هر شو، فقط هی غصه ایباره
پَسِ هر بیت و هر مصرع، دلُم شوقِ تونه داره
خوم ایمونُم وُ خوم هرشو،کنارِ قلبِ داغونُم
تو که رهتی دلُم سی تو، تکیشه خشته دیواره

#سهراب_عرب_زاده

درد و دل بی هر که کردم درد سر وابیده سیم

درد و دل بِی هر که کِردُم، درد سر وابیده سیم
دردَلوم بِی غم وُ غصه بیشتر، وابیده سیم
هر کیه محرم شناختم، زخم کاری زَه وَ مو
درد و دل کردن خدایا، بی ثمر وابیده سیم

درد و دل دَ نیکُنُم
دردَلوم مِن قلبمه
خوم وَ دهسه دردَلوم
زخم کاری خردمه

طاله ی بختُم کَجه
غصه یِ هر روزِ مو
قلبه مو هر شو خدا
گشته هی پا سوزه مو

هر کجا پا ایله دل، تا غم نشهسه رو به روم
هر زمان ایروم وَ در ، تا غصه هی بازی کُنه
هر چه ایخا بی خیال وابو دلُم تا نیتره
دهسه تقدیره وَ حالُم غصه هی راضی کُنه

#سهراب_عرب_زاده